ماں بننے کی کوشش نہ کرو
ماں اور بچہ بس میں سوار ہوئے ۔ ماں نے اپنا ٹکٹ تو لے لیا ۔ کنڈیکٹر نے بچے کی طرف غور سے دیکھا اور بولا ۔
’’بچے کا ٹکٹ بھی لیجئے محترمہ‘‘۔
’’مگر اس کی عمر تو تین سال ہے ‘‘۔ عورت نے کہا ۔
’’لیکن مجھے تو یہ پانچ سال کا نظر آرہا ہے ‘‘۔
ماں کو بڑاطیش آیا ،بولی ۔
’’بچہ میرا ہے ، تم خوامخواہ ماں بننے کی کوشش نہ کرو‘‘۔
منے کو بہلانا
گلی سے گزرتے ہوئے ایک صاحب نے دیکھا دس بارہ سال کا ایک بچہ گلی میں رکھے ہوئے کوڑے کے ڈرم کو سٹرک پر لڑھکا رہا ہے ۔
’’تم اس ڈرم کو سٹرک پر لڑھکا کیوں رہے ہو بیٹا ‘‘؟
راہ گیر نے اسے سمجھانے کے ارادے سے پوچھا ۔
’’منے کو بہلانے کے لئے ‘‘بچے نے جواب دیا ۔
’’اور منا کہاں ہے ؟‘‘ ان صاحب نے دریافت کیا ۔
’’ڈرم کے اندر ‘‘ ۔ جواب ملا ۔
