شمع

بزم جہاں میں مَیں بھی ہوں اے شمع! دردمند

فریاد درگرہ صفت دانۂ سپند

دی عشق نے حرارت سوزِِ دردں تجھے

اور گل فروشِ اشکِ شفق گوں کیا مجھے

یک بیں تری نظر صفتِ عاشقان راز

میری نگاہ مایۂ آشوبِ امیتاز

کعبے میں، بتکدے میں ہے یکساں تری ضیا

میں امتیاز دیر و حرم میں پھنسا ہوا

جلتی ہے تو کہ برقِ تجلّی سے دُور ہے

بیدرد تیرے سوز کو سمجھے کہ نور ہے

تو جل رہی ہے اور تجھے کچھ خبر نہیں

بینا ہے اور سوزِ دردں پر نظر نہیں

میں جوشِ اضطراب سے سیماب وار بھی

آگاہِ اضطرابِ دِل بے قرار بھی

یہ آگہی مری مجھے رکھتی ہے بیقرار

خوابیدہ اس شرر میں ہیں آتشکدے ہزار

یہ امتیازِِ رفعت و پستی اسی سے ہے!

گل میں مہک، شراب میں مستی اسی سے ہے

صِبح ازل جو حسن ہوا دلستاںِ عشق

آواز کُن ہوئی تپش آموزِ جانِ عشق

یہ حکم تھا کہ گلشن ""کُنُ "" کی بہار دیکھ

ایک آنکھ لیکے خوابِ پریشاں ہزار دیکھ

مجھ سے خبر نہ پوچھ حجابِ وجود کی

شامِ فراق، صبح تھی میری نمود کی

وہ دن گئے کہ قید سے میں آشنا نہ تھا

زیبِ درختِ طور مرا آشیانہ تھا

قیدی ہوں اور قفس کو چمن جانتا ہوں میں

غربت کے غمکدے کو وطن جانتا ہوں میں

اے شمع! انتہائے فریبِ خیال دیکھ

مسجودِ ساکنانِ فلک کا مآل دیکھ

مضموں فراق کا ہوں، ثرّیا نشاں ہوں میں

آہنگ طبع ناظمِ کون و مکاں ہوں میں

باندھا مجھے جو اس نے تو چاہی مری نمود

تحریر کردیا سرِ دیوانِ ہست و بود

گوہر کو مشتِ خاک میں رہنا پسند ہے

بندش اگرچہ سُست ہے مضموں بلند ہے

چشمِ غلط نگر کا یہ سارا قصور ہے

عالم ظہورِ جلوۂِ ذوقِ شعور ہے

یہ سلسلہ زماں و مکاں کا کمند ہے

طوقِ گلوئے حسنِ تماشا پسند ہے

منزل کا اشتیاق ہے، گم کردہ راہ ہوں

اے شمع! میں اسیرِ فریبِ نگاہ ہوں

صیّاد آپ، حلقۂ دامِ ستم بھی آپ

بامِ حرم بھی، طائرِ بامِ حرم بھی آپ!

میں حُسنُ ہُوں کہ عشقِ سراپا گداز ہوں!

کھلتا نہیں کہ ناز ہوں میں یا نیاز ہوں

شاعر کا  نام : علامہ محمد اقبال ( iqbal )

کتاب کا نام : بانگ درا  ( bang e dara )