سسیمه یوخدی سس ویرن دانیش منیله فاطمه

هارا گیدیم گئجیله من دانیش منیله فاطمه

وطن غریبی اولموشام یتیبدی غم نهایته

زمانه دن داریخمیشام اورک یانور بو محنته

بیری قاپومی آچمیور گله منلیه صحبته

ایویمه یوخ گلیب گیدن دانیش منیله فاطمه

اوزاقلادیب بیله منه وطنده آشنا اوزون

گوزوم گزور بیرین گورم دیم اونا اورک سوزون

منی گورنده دوندرور بو شهریده هامی یوزون

بو غم چتیندی هر ندن دانیش منیله فاطمه

نه وعده لر حریص ایدوب بوامتی زمانیه

اوشاق بویوک بو شهریده کمک دوروبدی ثانیه

گوزوم دوشنده هر زمان او قانلی آستانیه

اورک یانور اسور بدن دانیش منیله فاطمه

کیم اولسا یاسلی رسمیدور گلوله دیده قونشولار

ویروله تسلیت اونا بیرآزجا قلبی رام اولار

دوشنده یاده نسگیلون اورک ملالیلن دولار

یاسیوا اولمادی گلن دانیش منیله فاطمه

بو چرخ کج روش دوروب مسیر جور و کینه ده

سالوبدی نقشه دست غم ستمله لوح سینه ده

قباقه ایش چیخوب بیله تانینمورام مدینه ده

وطن غریبی اولموشام دانی منیله فاطمه

گونوزلر اوخشیور ایویم خزان کشیده گلشنه

اودور گونون باتان چاقی گلور بیر اوزگه غم منه

قرانلیق ایوده صبحه جک گیجه لر آغلارام سنه

گلیلیم خزانیدن دانیش منیله فاطمه

((مرحوم معنوی اردبیلی))